Mésyé, Médam, La sosyété, koz èk moin sé koz avèk in kouyon - o pyé d’lo mir i oi lo mason. Si zot i viv isi La Rényon, sirman zot la fine romark in rivyèr i koul a-sèk. Pou kosa ? Pars la plui la pankor tonm dopi lontan sansa la tonm si tèlman pti pé ké la tèr la ramass tout le lo. Sa sé la vérité, mé kan zot i pass dsi in pon zot i pé romark la rivyèr sansa la ravine néna son nom. Son nom ? Sa sé in n’afèr, mé son danzé sa lé la, é si ou i port pa antansyon, si la plui la sharj dan lé o, ou i pé ète sir dan lé ba li koul a flo. Pa arienk an lo, mé an galé, an bou épi an boi kasé. L’èrla méfyé, pars si ou i sar fé lintérésan dan la rivyèr, èl lé pa tro pti ral aou, trène aou, épi final de kont zète aou dan la mèr. Mortibis-krévatis-est é mi koné in bonpé bon kamarade la pass konmsa. Alé ! konm bann moun déor i di : « Fé gaf la rivyèr kan li koul pa ». Ni artrouv pli d’van. Sipétadyé !