Matante Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, si mi suiv azot bien, mi domann pou kosa zot, bann rouj de fon konm zot, la prézant zéléksyon, pou kosa zot la okip bann post zélu. Pou kosa mi di sa ? Pars zot l’apré di toultan zot lété élu mé zot l’avé poin lo pouvoir pou fé dé shoz zot i trouv téi falé fèr é d’apré sak mi konpran sé zistoman lé shoz inportan ké zot l’avé poin lo pouvoir pou fèr. Akoz i démisyone pa dann in ka konmsa ? Akoz i di pa d’moun, mi sava prézant konm mèr mé moin nora poin lo pouvoir pou fèr sak i fodré fèr ? Akoz i di pa d’moun mi prézant konèye réjyonal mé moin nora poin lo pouvoir pou fèr sak i fo fèr ? Sé in n’afèr ké l’onèkté i komann pou fèr. Non ? ébin mi oi lé shoz konmsa pou mon par. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, mi suiv aou bien zordi. An kék mo ou l’apré asplik amoin sak bann rouj-de-fon la fé kisoi dann bann komine, kisoi dann konsèye zénéral, kisoi ankor dann konsèye réjyonal la pa ansèrv de riyin é nou nora myé fé débarass lo planshé épi lèss lé zot fèr ! Sak i pans lo bann zinstitisyon lé bon, sak lé marké dann l’intégrasyon final de kont i done anou lo mèm shans k’in komine La frans, k’in konsèye zénéral in départman sansa in konsèye réjyonal ninport ékèl réjyon La frans pou règ nout problèm... Matant pardon siouplé, mé dabor néna dé shoz bann rouj la fé épi bann shoz inportan, mé si zot la fé lo bann shoz inportan zot la touzour di i mank zoutiy dann sak l’éta i aksèp lèss pou nou. Anplis ké sa lo sistèm li mèm-néokolonyal - la mète anou lo fèr dann né pou anpèsh anou shanj lo péi konm téi falé shanj ali, dévlop ali konm i fo dévlop ali, défann nout l’idantité konm i fo défann ali. Pou lo rèss, lé vré, nout min té kant mèm in pé amaré dann nout do, mé téi falé épi i fo ankor aport la prèv dé sa, konmsa nout pèp rényoné i konpran bien dann kèl ka ni lé. Rol la nou la asumé mi pans nou la bien fé d’asumé. Tok ! Pran sa pou ou !