Lé vré lékol i amontr pa listoir La Rénion. Lé vré nou na konm dan lidé nou la pa shanjé dëpü
lë tan nout aryèr gran manman. Lé vré nou na konm dan lidé, nou lé sü nout galé dëpü li la sort dan la mèr. Solman, sa i ésküz pa nout ignorans.
Sa i ésküz pa lignorans bann zélü konm lë süpèr gatèr i ansèrv mèr la komïne Sintandré. Na troi solüssion dann son ka:lï sé in inbésil, lï pran anou pou in bann zinbésil, sansa lé dë an mem tan.
Ala in ralé-poussé i fini par in mor, in jen marmay. Zot i pë konprann dann kèl traka son famy i doi èt, lë bann voizin gaman, épï tout moun sak nana in pé réspé pou la vi . Marmay-la té in mahoré : i shanj pa arien la-dan. In gran soufrans i rès in gran soufrans : la mor in jen sé in gran soufrans.
Sof pou in moun lé mèr Sintandré : ala lï trouv lokazion pou kritik bann mahoré. Ala li oi vin zanfan dan la kaz banna. Ala li oi rabatèr zanfan mahoré partou. Rabatèr ? Sa i di pou zanimo.
Alor bann zanfan mahoré sé zanimo ? Léspri Lepen i souf jiska La Rénion ?
Ala li souf dan la tèt in moun, li-mem sinonsa son zansèt, la soufèr bann rasist. Li rapèl pï sa ?
Lé bien vré : mémoir lièv la pa mémoir zéléfan. Lë tan i lav la tèt par anndan !