In fanal ? Mi pans zot i koné ankor kosa i lé. Pou moin sé in lanp tanpète i marsh avèk pétrol épi li anpar lo van avèk son vitr é ou i port ali avèk son lans an métal. Bann fransè, pou z’ot par, i anparl lantèrn mé mi pans sé lo mèm z’afèr. Romark koméla néna lantèrn avèk solèy pou karbiran. Moin la ziska vi in fanal solèr dann lo l’internet ! Mé konm zot i doi douté la pa pou lo lanp épi son karbiran mi parl azot kozman-la. Sé in l’éksprésyon i vé dir : mèrsi pou out lésplikasyon pars té in n’afèr moin téi koné pa, sansa moin té i ansouvien pi. Avèk lo l’az i ariv a obliyé pli souvan k’i fo. Ziz pi si ou la trap in pti grin l’ayzaymèr mé i ariv a obliyé san sa konm moin é ir zot la fine fé l’éspéryans. Alé ! Mi lèss azot rofléshi la dsi é ni artrouv pli d’van sipétadyé.