Médame, zé Méssyé, la Sosyété koze èk mwin sé koze èk in kouyon, mé sé o pyé d’lo mir k’i oi lo masson.

Mézami, d’apré sak mi koné provèrb-la, sa in provèrb maoré mé li pé alé avèk toute péi demoune i manz zanbrovate pars léguime-lla zot i koné sa i done in bonpé lo gaz donk la pa bézoin bak +24 pou konprann lo sanss prope. Mwin la mèm lir é sa lé assé kouran lo provèrb : « Mèrssi pou avoir rofiz amwin zanbrovate, sa la évite amwin pété ? »

Mé konm mi di azot konm provèrb, li néna in sanss pli zénéral k’i pèrmète ali rante dann la vi sossyal demoune – In sitoiyin i pé di avèk lo mèr : mèrssi méssyé lo mèr pou avoir rofiz amwin in plass travaye, konmsa mi rèss la kaz pou okipe marmaye. Ni konpran toutsuite sa la pa in romèrsiman pou do vré, mé in foutan largué… Néna in bonpé sirkonstanss la vi sosyal i pé ansèrv kozman-la.

Alé, mi kite azot rofléshi la dsi é ni artrouv pli d’van. Sipétadyé.