Se matin, mi oi dann journal bann prodiktèr lalkol la drèss kont la réjion, par raport zot i prétan pa i mète loktroi d’mèr déssi zot prodiksion. Solman zot i rokoné lalkol i fé bonpé d’tor bann Rénioné, jènn li, gramoun li, vié moun li, zonm li ! fanm galman. Moin la antandi azot, dann télé, apré koz konm je-sé-tou. Alor, mi di dann mon kèr, si se bann moun i koné vréman kossa i fo fèr, koman i fo fèr, mi trouv ziska drol la pankor fé ziska zordi. I prétan dir zot i koné koman pa fors déssi lalkol !

Pli pir, pandan k’zot i koz, sé bann marmay k’i tonm dann la boisson épi i zoué in zé i apèl : koman soul an vitès, san pèrd lo tan ? Alé oir bann zétidian ! Fé boir azot vant plin san dépansé ! Ziska k’zot i roul dann kanal ! Ousa zot i viv don ? Kèl kalité d’moun zot i frékant don ?

Moin, mi koné in zé la poin parad : in pariaz rant dalon pou oir kissa i boir in lit lo ronm in kou, san arété. Sa in zé bandé, si tèlman bandé ké sak la gingn lo konkour i mor toutsuit. Listoir la pa di si i rékonpans azot an donan sèrkèy, shanm finérèr épi in transpor dann mèrcédès, épi barbo dovan simitir.

Alé, in pti léfor méssié é médam lé prodiktèr, moin lé sir zot va trouv mié k’sa, moin lé sir zot va transform lo boir-lalkol an éspor, vik zot i vé pa k’i goumant solman lo pri. Aprésa, bann famiy nora pèrd zot zanfan bètman, bann madam nora gingn lo kou èk zot mari luilé a blok, sak va roul tout z’ot vi dann fotèy roulante par la fote in shofèr la dépass la doz, sak lo foi sar kui, lo sèrvo ramolo, lo sistèm nèrvé an zobolmouk, bann zanfan nora souf lalkolism fétal, bann famiy nora batay konm lo shien anrazé... tousa bann-la va vni an délégassion pou dir azot mèrsi. Mèrsi pou sèrvis zot la rann la popilassion !

Justin