Demoun lavé in bon pti pé, mé i arsanm in bann dalon ! Tousa dalon pou akonpagn dé moun dann z’ot mariaz ? Rienk a oir sa, moin na linpréssion mon kèr i fonn in pé, épi dann mon zié in sort limidité...
Kossa mi antann ? L’adzoint-lo mèr i koz an kréol. Zis pou komansé, mi di dann mon kèr pars apré mi koné nana in konplikassion l’artik kod sivil. Sa lé an bob, an zobok, karéman an zobolmou. Mi kalkil sa i sava koup lo siflé lo madam l’adzoint. Non va, alak k’èl i lir bien konm k’i fo lo bann zartik inn-dé dalon la mète an kréol... Moush i vol pi ! Tout demoun i ékout ! Kossa ? I di tousala dann zartik-la don ? I donn si tèlman bon lindikassion k’sa. Don ? Ziska zordi moin té i kroi i lir bann kozman-la pou la form, akoz la loi i di k’i fo, mé kan i ariv la, somèy i pèz amoin a’tèr. Koman ? Sa lé sérié konmsa pou amène in ménaz don ? Pou la kèstionn bidzé la famiy, pou lédikasion marmay, pou ète solidèr dann ménaz.
A oui, fransh vérité madam l’adzoint, ou la bien lir, ou la fé konprann anou dé shoz zordi ! Ou la bien fé konprann lo moun kèl kalité langazman i pran kan i marié. Demoun la bate la min. Bien sir sak té pli kontan té lé dé marié, sa lé normal ! Mé nou, z’ot bann dalon, tout sak té la pou apiy lo rin, nou ossi nou té bien-éré. D’ordinèr, mi èm pa lo samdi, mé a partir kan v’ariv so zour-la, m’a kalkil sérémoni-la dann la méri La Possession. Lo zour dé dalon la marié épi la mète z’ot bonèr sou lo sign l’amour nout lang, l’amour nout nout kultu.
Mèrsi, mèrsi bien pou so gayar l’instan nou la pass an parmi !

Justin