Mon bann dalon sa in provèrb péi komor mé si mi fyé dsi lo tradiksyon mi oi « in jénèr i sava » é mi doi dir azot mi oi pa pou kosa lo tradiktèr la mark sa. Pars pou moin sa néna in n’ot sans ! Sans prop ni sézi toutsuit, nou la pa tyé kouyon pou pran son plas mé sans figiré, kosa kozman – la i vé dir ? Dizon zanbrovate lé bon é si néna sa dann in ropa partaz, lé normal mi vé gouté, mé si lé shoz la pa déroul konm mi vé. Si mi trouv figir d’boi kan mi dékouvèr marmite ébin moin sar désu mé pou pa montré mi pé larg in foutan é sak la koup amoin zèrb sou lo pyé i pé pran l’afèr pou li. Lé pa ké moin lé kontan, mé mi vé dir, mi mor arpa pou sa. In zour moin la antann in zouvriyé apré di avèk in patron manké : « Mèrsi sak la pa done amoin travaye, li la évite amoin la fatig ! ». Zot i pans pa kozman-la lé in pé parèye sak moin la mark an-o la ? Alé ! Mi kite azot rofléshi la dsi é ni artrouv pli d’van. Sipétadyé !