Mésyé James Michel i tonm prézidan Sésèl dépi l’ané 2004. Sa la pa in moun bien koni isi dan La Rényon. Sak té i koné pa li la gingn lokazyon antann son diskour épi oir si zot i aprésyé son z’idé ou pa, si zot i aprésyé son pèrsonalité ou bien non. Noré bonpé z’afèr pou dir dési lo péi, dési la politik banna i amène, é dési lo rézilta. Pars sak i fo konète, Sésèl sa in péi, konm di lo kont, i doi baz dési son prop fors... é li pé baz dési son prop fors vi ké lo pèp i soutien son gouvèrnman.

Mé in n’afèr la bote amoin dann son diskour, sé ké li la fé son kozman dann troi lang : dann la lang anglèz, dann la lang fransèz épi dann la lang kréol séséloiz. Dann la lang anglèz pars bann Morisien é bann Maldive i koz sansa i konpran bien lang bann z’Anglé, dann la lang fransèz pars in bonpé péi i konpran la lang fransèz, épi dann la lang kréol pou li koz ansanm la zénès son péi. Moin la trouv sa konm in mark réspé pou bann vizitèr é pou bien amontré li viv anparmi lo pèp son péi. Dayèr, i fo ni koné ké lo kréol, lang bann z’Anglé épi lo fransé, sa i amontr dann lékol, é bien antandi, la pa pou sa ké zot i aprann pa lékol. Sanm pou moin, sa i rouvèr myé zot léspri. Biensir, sa lé pa vré arienk pou lo prézidan, sa lé vré osi pou lo pèp.

Donk, mi pans, sak i vé anklav nout léspri dann lo fransé solman i gaspiy nout zénès. Tout demoun i koné, oplis ou i aprann bann lang, oplis ou na la fasilité pou aprann. Kan ni bate in pti karé l’il Maurice, ni apèrsoi, bann travayèr, dann lotèl ou bien dann komèrs, i pé koz èk ou dann la lang fransé, avèk in ot dann la lang z’anglé, épi an kréol èk son nasyon. Anplis ké sa, konm zot i koné koz troi lang, zot i pé azout in katryèm, sansa in sinkyème. Sa lé vré galman dann Sésèl, mé sa lé pa tro vré La Rényon. Mèrsi Sésèl pou an avoir rasir anou la dsi !

NB : Lé vré ké dann l’il Maurice, lo kréol na poin ankor tout la plas i mérite ali dan l’ansègnman, mé li lé pa krazé konm isi, é banna i détak la lang pli fasilman ké nou.

Justin