Koman mèt nout lémosion si koté kan ni kalkil, zordi, “Témoignages” nana soisantan ? Soisantan, i fé troi foi vintan. Sa i vé dir nana o moins’ troi zénérasion Rénioné - ènn apré lot, é la min dan la main o travèr in zournal - la mèt ansanm pou pouss flanbo La Rénion touzour pli o !

Kisa nou lé, kosa nou vé, koman fé rèspèkt anou, mé sirtou koman avans’ toute do moun ansanm...? Ala in tralé kèstion la travay koko nout zansèt, sat bann dalon avanou é la not.
Dopi lo débi, “Témoignages” lé anplin koko d’kèr lo gran kabar La Rénion pou trouv son voi. In voi partikilié, in voi i fo fé grandi ankor pou fé antann anou partou !

In batay tou lé zour. La pa fasil, mé dousman-dousman i vyin. É si zordi solèy i briy in pé plis si nout zournal, fo pa ni oubli sat avanou - dann in malizé difisilman mazinab - la batay pouk “Témoignages” i viv. Koman pa pans’ in boug konm Bruny Payet, sézi dann son pé d’byin parske dirèktèr “Témoignages” !
Koman sirtou pa pans’ tousa travayièr rénioné, souvan té koné pa lir, mé té sakrifi azot kanmèm pou èd in zournal té défann azot, zot zournal ! A tousala é a zot toute, “Témoignages” i di mèrsi é i partaz son lanivèrsèr !

Justin