Mésyé, Médam, La sosyété, koz èk moin sé koz èk in kouyon-sé o pyé d’lo mir k’i oi lo mason, Mi pans kozman ni anparl azot zordi la pa fé pou étone azot. Dabor pars nout sosyété i fonksyone in pé konmsa é sirman bann bank i marsh konmsa zot. Konbien foi sa l’ariv amoin kan téi mank amoin sink santme pou fé in fran : si moin larzan fé lo larzan moin té i vé anprété gran kèr la bank téi anprète amoin – intéré é prinispal konm dann la sigal épi La fourmi vi par La fontaine. Mé si moin l’avé poin larzan fé, la bank téi réponn amoin difisilman. Mi souvien mèm in zour in bank la rofiz amoin in krédi épi la pèrsone la di avèk moin : « Ou va romèrsyé amoin pars moin la pa anprète aou larzan ! ». An rotour moin la di mèrsi d’avans ziska k’in zour la pèrsone la koz avèk moin dann shomin épi la di son bank la rofiz ali krédi. Moin téi vé domand ali si si li l’avé romèrsyé son bank mé moin la pa fé, moin la zis pans son l’anboulkidi téi konsèrn pa moin. Alé ! Mi kite azot rofléshi la dsi é ni artrouv pli d’van. Sipétadyé !