Mé mwn la fine dir sak mi panss bann arvizitèr-arvizitèz é mon poin d’vizé lé in pé konm sète in kizinyèz La Rényon, mi rapèl pi son nom mé sak mi rapèl kan la anparl aèl « rovizite » sansa « arvizite » rogaye sossis, èl la di dann télé, la pèrssone i fé sa, na ka rode in kamarade pou li.Mi panss parèye, pars si in pé i sava rode toute pla, toute kari, toute soss, toute déssèr i égziss dsi la tèr é i sava rovizité,inn zot lé pankor ariv la gare, dë zot pti léspèryanss kéke zour kékzané sar arien a koté léspèryanss de moune dsu plizyèr syèk.

Zot néna ka aprande koman i fé ,é sa va prande azot in bon boute de tan avan gingn lo kou d’min k’i fo. Mézami lèss amwin dir azot sak lé sinp lé pli difissil pou fé pars li domande in kou d’min wi trape pa sa toutsuite pou toutsuite. Wi prétan édike papiye demoune é bin bon kouraz pars sa i fé pa an in néstan. In papiye mézami sa la pa bézoin d’ète forssé,li la mète dé zané é dé zané pou li vnir sak li lé vnu é si wi pé tronpe ali, in kou, lé riskab li rovien dann son éta li lété d’dan é li va artonb vite dann lo beurk pli vite ké zot i kroi.

In pti mo pou fini dsu in léspèryans mwin la vu parla : in moune la fé in pla i fé normalman dann l’erope é li la mète massalé dedan. Mi koné pa koman son bande kamarade la apréssyé sa, mé sak mwin lé sir sé ké di zot la nyabou tronpe lo papiye in kou, zot i gingn ar pa tronpe ali a tou lé kou.

In sèl zafèr, mi éspèr afors mélanjé dann lo mélanjaj zot va évite kass zot santé.

A bon ékoutèr, salu.