Moin lé dann l’aéropor Zilo, zis landroi pasazé i sort. Konm sé la Noèl, l’aéropor lé bien dékoré : nana mèm in spès bourik ti-korn i apèl rènn. Nana galman in Pèr Noèl an rouz épi an blan dann in linz sho, l’èr in pé malis, nana inn dé kado, épi sirman in pti pé la nèz.

Kossa ? Lo rènn ! La nèz ! Pèr Noèl dann in linz i shof ! Oussa ni lé don ? La tèr la vir dovan déyèr ? Nou la fine tonm dan livèr ? Nou la fine tonm dan la Frans don ? I fo mi pins amoin in pé. Non va, nou lé issi, nou lé la Rénion, près dessou tropik kaprikorn : an plin dann kèr l’été, an plin dann kèr la sézon sho.

Alor, Pèr Noèl la tronp landroi, la tronp lékipman, té i pans li té sava dann nor la-ba, dann la féfrésité ? Sansa demoun la mal indik ali landroi, la pa di ali kèl linz li doi mète, la pa di ali si li té i doi prann in kariol bourik, sansa in tréno ?

Lé ga, koman zot tète lé anklavé don ? Koman zot lé aliéné don ? Méssié lo Prézidan la shanm komèrs, mi pans issi ossi i gingn fé in bon dékorassion Noèl : létshi, flanboiyan, bann flèr, bann frui, épi bann gramoun la Rénion, bann gramoun toukoulèr. I ginn fé kèkshoz sanm sa ? Touléka, sak la fé i sava pa avèk nou sa ! Sa i va pa nou ditou !

Justin