Ou sé in moun inportan vik ou i diriz in kolèz. Ou i koné kossa la télé, lo radio épi bann zournal i roprézant pou l’opignon, vik out tablisman nana son prop zournal i apèl "Katrépis".
Mi pans ou lé o kouran tout kalité polémik nana déssi la lang kréol La Rénion : koman sa i diviz bann paran, bann famiy, bann zélèv mèm !

Ou i koné, o moin ou i doi konète, l’artik 18 la LOOM, épi moin lé sir ou la fine oir la list bann lang rézional la Frans ! Ou la vi lang kréol La Rénion, sé in lang rézional la Frans !
Ou i koné koman in lang lé inportan pou in kiltir, donk koman la lang kréol La Rénion lé inportan pou la kiltir rénionèz... Ou la fine antann dir la lang, sé lo promié sign lo zéni in pèp, donk ou i koné la lang kréol sa i fé parti nout zéni, a nou bann Rénioné.

Alor, di a nou, akoz ou la fé sak ou la fé ? Akoz ou la zir nout lang, nout kiltir, nout pèp, an piblik an plis ? Ou la pète in kab, sansa out l’éspri lé barbouyé ?

Justin