Koman ? Kossa mi antann ? Na in pé i oz kant mèm ! In moun konm ou, banna la fé aou sa ? A ! Lo bann san konprann, lo bann tèt vid. Sé sa lo bann saz-la ? Démié banna la pa shoizi aou. Fransh vérité zot té mérite pa in onm konm ou !
In onm la si tèlman fé mal bann ti-kolon : bann travayèr, bann shomèr, bann vié pèrsone, bann andikapé étsétéré-étsétéra la ké lo ra... Si ou i konétré konbienn foi nou la kri out nom dann shomin, konbienn shanté nou la shanté, pou sèy dir aou agard anou in pé, arèt ral déssi la kord koté li lé fay ?
Sirtou kan ou la fine fatig anou, arète vant aou, arète di na poin in méyèr zafèr ké sak ou la fé, arète di ou i travay pou La Frans d’an-ba, vik ou té apré fout ali ankor pli ba, kaziman dann fon...
Ni oi ou konm in moun lavé poin pitié sof pou bann rish. Défoi k’i artrouv banna dann in parkour golf épi i larg aou, dann out figuie karé, in koud kleub (i ékri klub mé i di kleub ?!...), sansa dann in gran mariaz rant méssié De... épi mamzèl De... Ou bien déssi bann gran-gran Yort (i ékri Yatch mé i di yort ?!...). Mazine in pé in moun la oté, i fout aou in rès trankil dovan toulmoun ?
Anfin, ou la séy gingn la plas prézidan Sénat, ou la pa gagné... Lé konm sa, lé pa otreman ! Noir sé noir, il n’y a plus d’espoir, ou lé dan l’arozoir... Romark, droit pou droit, na poin arien pou tiré la-dan, mé kant mèm in satisfaksion pou nou, bann ti-kolon... ou la pèrd !
Arienk pou sa, pou an avoir klèrsi in pé nout sièl in pti néstan, méssié Raffarin, ni fé aou bien konpliman.

Justin