Mi rèv fé inn-dé modékri déssi la bours, la moné, l’inflasyon, lo déflasyon... anfin toute sak i fé k’in pé i konpran byin lékonomi mondyal. Pars déssi késtyon-la, moin lé blizé d’dir, moin lé konm in zéro la gosh in shif. Donk i vo myé mi anparl pa. Pars konm di lo kozman byin koni, i vo myé fèrm son boush épi pass pou in kouyon, ké rouvèr ali é donn a konprann ou lé kouyon pou vréman.
Mé, fransh vérité, mi pouré fèr pars nana demoun byin instruiyé, byin plassé, solon moin, i konpran pa tro non pli. In légzanp ? Méssyé Fillon. Ala pa k’dann in diskour ofisyèl li mète a dir, li pèrsonèl li lé pa kont la parité rant l’éro é lo dollar. Bann spékilatèr, la pans méssyé Fillon, in gran dirizan, lété pou in mèm valèr rant lo dollar épi l’ éro. Oté Baba, la valèr l’éro la dégréné, la tonm pli ba ké dann l’ané 2006.
Alor gouvèrnman fransé, la di sé in mové tradiksyon, pars parité la pa l’égalité, sé aryink in konparézon rant la valèr d’inn é la valèr d’lote. L’èr-la, mi komans ète trakassé pars si sa lé vré, la parité rant onm é fanm la pa l’égalité non pli… Mi souvyin ossi nou té kont la parité é pou l’égalité zalokassyon familyal. Poitan gouvèrnman té i ésplik anou sé lo mèm z’afèr… Méssyé "Larousse", diksyonèr la lang fransèz, i trouv moiyin dir : parité sé l’égalité parfé, mèm lékivalans lo shanj rant dë moné.
Alor, méssyé Fillon, asplik anou sa, pars mi konpran pa byin… moin lé mèm pèrdi… kan i di amoin k’i fo pa konfonn parité avèk parité. Ou i konpran amoin, mi éspèr !

Justin

NB : Lé konpliké in,méssyé Promyéminis !