I pé lir dann la déklarasyon ban droi de l’om : « Bann demoun i éné lib épi égal dann z’ot droi ». Bann dépité "les États généraux" la vote sa dann l’ané 1789. I diré, in pé la fine oubliyé.

Ala sak in bon fransé la di
Na in ga i apèl Jean-Paul Guerlain. Li la ramas l’éritaz in sosyété bann gran parfimèr. Li la sort i san-bon. Pou fé valoir ali, li la di : « Moin la mète a travay konm in Noir. Mi koné pa si bann nèg l’a déza travay si tan tèlman »… Rasism sa lé konm zoumine, ou i arash ali toultan é toultan li arpous.

Lo déstin trajik bann Noir
Bann Noir l’Afrik la konète in déstin trazik : la tir azot dan l’Afrik par milyon, la déport azot landroi zot té i koné mèm pa, la mète azot dann lésklavaz pars i paré bann z’Éropéin té i gingn pa travay dann péi sho, la pran zot kontinan, la koup par boute, la apèl sa koloni… déporté, zésklav, z’angazé, kolonizé, méprizé, épi i oz ankor trète azot konmsa ?

Hitler épi Jess Owens
Méssyé Guèrlain, ou i an souvyin in boug té i apèl Hitler ? Ou i an souvyin ossi l’avé in shanpion té i apèl Jess Owens la gingn in takon médaye zé z’olinpik Berlin ? Ou i koné, lo promyé la pa vouli sèr la min lo dézyèm. Bin ou, ou nora sèr la min shanpion-la, sansa non ? A moins ké ou nora parti lav out min apré !

Justin