Promyé zafèr : Dabor m’a rapèl azot in provèrb demoune i di laba dann lé zantiye : provèrb-la i di, la pa pars wi koze franssé ké ou lé méyèr é pli intélizan ké sak i koze in kréol kissoi lo rényoné, ou d’ote, sansain n’ote kalité langaz.

Dézyèm zafèr mi tienbo dir azot :

Zot i koné issi la Rényon néna 116000 moune lé konsidéré konm ilétré dann fransé. Donk sa i vé dir sa i annui pa zot kan zot l’apré kozé ké 116000 pèrsone i konpran pa zot… Donk kan zot i koze franssé é ké lo moune i réponde an franssé pars i vé pa z’ète dézagréab zot i pran in gran résponsabilité.

Troizyèm zafèr m’a dir azot :

Zot i koné néna a popré 80 % d’moune i konpran kréol rényoné. Donk dann in promyé tan, i fo koze avèk so 80 % demoune-la. Mé néna ankor 20 % i konpran pa kréol rényoné, donk i fo soutitré konmsa dann lo 20 % i pé koze ankor avèk in bon kantité d’moune. Sé sa la démokrasi non ? Sé fé konprande aou par lo moune wi koze ansanmé pi fé konprande oute bande zinvité. Sa lé démokratik sa ! Zot i panss pa ?

Donk ala mon katriyèm romark :

Zot i koné laba Moris néna zémission dann franssé, dann langlé, dann kréol, épi d’ote lang. Issi i gingn pa fé mwins ké sa : in lémission dann dë lang solman. Lo bilanguism i intérèss pa zot ? Lé grav si zot métyé épi zot mission i konsist a fé pass linformassion dann lopinyon é si zot i fé pa.

Si mi pé m’a dir azot in sinkyèm zafèr :

Mi vé d’mande azot dann kèl nivo d’lang zot i vé poze zot késtyon é dann kèl nivo zot i angante lo moune pou réponde azot ? Pars si zot i désside koze lo franssé inivèrsitère lé possib pliss la moityé La Rényon i konpran pa zot… Mé pétète sa i fé azot ni fré ni sho é sa i diminyé pa zot pèye.

Alor dann in ka konmsa i fo solman éspère ké d’moune na pliss soussi pou fé konprande azot i désside avèk lo moiyin k’i fo fé in télé demoune i konpran in pé pliss ké sa. Tanka bande député – bande proshin – mi mète l’afèr dann zot min épi mi souète sa sar in soussi pou zot pou toute in lézislatir k’i vien.

A bon ékoutèr, salu !

Justin