Pardon, éskïz ! Vi koné nana dëkoi dmoun i koz kéol rénioné, issi La Rénion. Mi diré mem, nana in ta-avèk in paké. Alor, mi dëmann a vou, si d’apré vou, la Répïblik i fé assé in kont avèk toussa dmoun i koz kréol rénioné.

Mi dëmann avou, si par égzanp, d’apré vou, lékol i réspèkt bien bann marmay kan i fé sanblan zot i manyé la lang fransèz konm si zot lavé tranp dëdan an néssan. Mi dëmann avou galman, si tribïnal i réspèkt bann moun, kan i koz avèk zot, an fransé gaskoné kan zot i pass an prosé.

Mi dëmann avou ankor si, sëlon vou, lë kréol rénioné nana la plass ki konvien alï dann télé, dann radio, dann journal. Si par égzanp vou nora émé, kan vi ékout la radio, dann vot joli loto klimatizé, si vou nora été kontan antann solman demoun i sort dëor ou bien bann péroké d’shé vou, donn paké lümour anglé, sansa gro léspri kréol a-titré san éstopé.

Méssyé le Prézidan sansa madam la Prézidant a prétann, m’a la fé in n’éfor pou prèss koz fransé avèk vou. Vi konpran, kréol nana lonètté. Mi dout pa vou va konprann amoin.

Justin