Matant Zélida la ékrir Justin :
Mon shèr nové, mon spès salté !
Konm moin lé kontan nout ti prézidan la vni La Rényon, é lété déza tan pars bann rouj-de-fon lété apré di toute z’afèr déssi li. Mèm, té paré pou donn ali lé z’ord pou li fèr sak li nana pou fé. Touléka, li la trouv la répons té i mérite azot : li la di konm de koi shakinn i doi tash moiyin fèr sak i rovyin ali d’fèr. Li la arzoute èk sa inn-dé pti-mo, pou moin, sa lété dèstiné pou zot. Li la di i fo arète viv dann l’asistana. Tok ! Pran sa pou zot !

Justin la fé aèl pou répons :
Mon vyé matant k’i koz touzour la boush rouvèr !
Si ou la byin ékout lo prézidan, li la anploy bann mo la fé byin plézir bann moun konm nou : li la anparl l’éksélans, li la di nou lé an avans kèstyonn lénèrzi prop, li la di li vé oir La Rényon fé l’éspérimantasyon grandèr natir lo dévlopman dirab… é si, é sa. Boudikont, li la roprann bann mo, bann z’idé Paul Vèrgès i tiliz dépi plis dizan, é sa la fé plézir anou... fransh vérité. Solman li la anploy in mo, sa la pa bon ditou pou nou, pars si dépi 1946, l’avé fé l’égalité sosyal... si dopi 1975, l’avé aplik nout z’idé déssi lo dévlopman, shomaz noré pa été konm li lé zordi é la mizèr noré pa été for konm sa. Lo tan pèrdi, sé pa par nou, sé par la Droite é sé par toute gouvèrnman la vni dan la Frans inn déyèr l’ote. Alors, méssyé lo prézidan, koz pa nou l’asistana, sa in mo ni èm pa ditou sa !

 Justin