Méssyé Préfé asiz déyèr son tab travay, l’apré fé in kalkil konpliké, li koz an kalkilan :
Mi poz zéro, mi artyin toute. Mi arzoute kat par issi, mi artir sink par-la. Mi miltipliy lo pri lésans brite la-ba Chicoutimi, avèk sète Kamshatka, épi lo pri bann trafikan déssi marshé noir. Kaloubadya dann tant-kouvèrt.
Mi tyinbo kont lindis batiman, lindis gloubiboulga dann fime Kazimir. Mi arzoute sa avèk lo nonb avogadro, dis puissans moins vinn-troi, plis si zé sé le fèr, katré-tyèr-dé-pi-’r-troi mèm si la sfèr lé an boi. Mi pran lo pri moi d’aoute mil nèf san douz, mil nèf san vinn-dé, mil nèf sa trann-dé… étsétéri,étsétéra, la ké lo ra.
Mi pran formil konpliké tèr-la. Kan moin la fini, mi sava rode la fors l’atraksyon la bav léskargo rant la tèr épi la line. Mi artrap in dézyinm fèy par raporte sète-la lé plin. Lèrla, mi arpran pou byin vérifyé. Lé séryé sa, i fo pa tronpé : mi poz zéro, mi artyin toute. Mi arzoute par issi, mi artir par-la, mi rode lo pri lésans la-ba chikoutimi.
In bèl gabyé kosto i anbar la porte, daoir tansyon Ratenon i vyin déranz son patron pou gingn lo formil pou kalkil lo pri lésans... Mé ala in boug i ariv avèk in l’anvlop dan la min, li di avèk lo gardyin : « Sa in lète lé préssé, i fo done méssyé préfé. Sa i sorte Lo Por sa-mèm-mèm, mon bann patron la SRPP la fine fé lo kalkil. La pa bézoin li kass son tète ! »
Préfé i an apèrsoi épi li vyin rode lo z’anvlop. Li di lo boug mèrsis é li di konm-de-koi, li va oir si i trouv mèm rézilta ké li. Li assir déyèr son biro, in n’éstan. Li rouv lo lanvlop, li rogarde kossa lé marké déssi. Li lé byin rokonéssan, son bann z’amiz la SRPP la fine fé lo kalkil an toboz-la pou li. Li mark lo bann shif déssi in papyé, épi li di, dann son kèr : « Lé bon pou sa-mèm, mi sar pa anbaras amoin avèk sa ! Si i fo goumanté, va goumanté, in poin é sé tou. Sak lé pa kontan, li va pran konstan ! »
Aprésa, li kalkil li l’apré fé son diskour pou son fitir dépar : « zé koni dé zans admirab. » Mé la suite i vyin pa. Li va trouv lo rèst apré. Lé pa prèssé. Méssyé Préfé i arfléshi.

Justin

Lésplikasyon inn-dé pti mo :

kaloubadya dann tant kouvèrt : marshé noir.
globiboulga : lo manzé Kazimir.
lo nonm avogadro : in z’afèr konpliké.
katré tyèr dé pi-r-troi : volime la sfèr.
mi poz zéro, mi artyin toute : koman in boug o-ki i alimante son kont la bank.