La Rényon, in pti péi, mé lé pa fasil konète toulmoun. Mi vé pa di konète toute demoun, toute ti-kolon. Sa lé pa possib in n’afèr konmsa ! Kan mi di toulmoun, mi vé di demoun sak lé inportan dann in séktèr, demoun i kont plis ké pou la po patate, pars na dé foi in moun i ariv dan la limyèr l’aktyalité, é ou i domann kissa i lé sa ? Kosa sa la fé pou ariv landroi li lé ? Pars demoun lé konmsa. Zot l’apré domandé souvan-dé foi kèl gran mérite lo boug ou bien lo fanm nana pou okip lo post la done ali pou okipé, pars, tansyon, lé fasil kriy la pèrsone lé pistoné, mé lé pa touzour vré.
Madam Bénard i okip l’ilétrism la Réjyon. Lé normal, pars i prétan èl i tonm éspésyalis la-dan, pars shak foi èl la koz dann in radyo, demoun la romark èl té i koné kaziman lo problèm a-donf. In légzanp ? In zour èl la di nana in bonpé l’ilétrism La Rényon. Sé dir si èl i koné son sizé ! La Réjyon, touzour, la pran in vis-prézidan la Kiltir i apèl Zan-Fransoi Sita. Moin té i kroi boug-la té in gran l’aktèr kiltirèl, moin la parti déssi intèrnet pou oir kossa li l’avé ékri, si sé in boug la fé film, si li la ékrir liv. Moin la pa trouv arien !
Moin la mazine pomp finèb, vi k’na inn i travay la-dan, é li nana so nom-la, mé moin la déshanté, pars pomp finèb, sa i done pa in gran kalifikasyon pou travay dan la Kiltir. Moin na in dalon la di amoin, lo boug i travay bann natir morte. So kou issi, lé plis konprénab. Mé i fé pa kant-mèm avèk li in gran l’éspésyalis la Kiltir. In kou mèm, moin la antann li la okip in késtyonn liv. Mi arvann konm moin l’ashté, mé i prétan dir, sé li k’la pèy lo liv Magamootou... in liv té i vann pa tro. Konm Sita na la monaye, li la pèy lo liv. Mé, ankor in foi, sa i fé pa avèk li in gran l’intéléktyèl !
Dimansh passé, li la roganiz in zourné porte rouvèr Stella Matutina, mé solman la transform an zourné porte fèrmé, pars lo pèrsonèl n’avé késtyon pou poz ali, mé li, li l’avé poin répons pou doné. L’èr-la, li la di lo mèr kartyé troi lète : "Fèrm out guèl !". L’èr-la, sa i fé pans amoin, li noré plito, konm k’i diré, la kiltir boush sal.

Justin