Mé wala, mi panss i fo déza oir koman toussala la spassé avan fé bann gran déklarassion dann vide. Pars sil’avé pas passé sak la spassé néna sinkantan bannzil komor nora pa été dann l’arozoir konm zot i lé koméla. Nou ossi La Rényon nou noré pa été dann lanmèrdatoir konm ni lé é plizanpliss.

Méssyé Vals, I fo pa wi gnore koman lo référandome la spassé : moi d’déssanm 1974. Wi rapèl bien gouvèrnman franssé la désside roganiz in vote pou lotodéterminassion bannzil Komor, dann tan-la lété in sèl é mèm koloni franssèz. La fé lo vote é lo kor éléktoral la vote pou lindépandanss. San lo kou d’Jarnak gouvèrnman La franss la fé.

Méssyé Vals, lo soir d’référandome, bannzil komor té indépandan sof… lo kou d’ La franss la désside ral Mayotte avèk èl an vyolassion mlo droi internassional la dékolonizassion.

Aprésa la fé toute sorte maniganss mé zamé La Franss la vréman aplike lo droi internassyonal la dékolonizassion… Alor astèr, dir bann komorien sauf Maoré sé bann zétranzé dann Mayotte par rapor bann maoré sé lanss in ilégalité é sé rojète lo droi internassional. Astèr ké Manuel Vals i di kékshoz konm li la di ébin sa i vé dir sinploman li rojète lo droi internassional épi li partaz san pour san lo prinssip la dominassion kolonyal.

Astèr kossa l’arivé ? l fé toute in bann maniganss é toute lété pa fé dann la légalité é kan lo Prézidan La Répiblik komor i di bann komorien lé pa dann lilégalité kan zot lé dann Mayotte li la rézon sof ké ni pé dir la franss la si tèlman torpiye lo référandome dsi lotodéterminassion bannzil komor ké lé bien dir dann in ka konmsa d’rétablir la légalité internassyonal.

Mé néna in zour i apèl domin !

Astèr kan Vals i di li va déporte trant-sink mil rézidan dann lilégalité shak ané avèk bann moiyin nouvo avèk lo risk voir in bonpé pliss de moune zété dann fon loséan indien avèk lo risk oir loséan dovnir in pli gran simtyèr marin.

Vals, ou la fé in drol parkour dopi lo tan ou téi réklam lidéolozi sossyaliss… Astèr sak i domann gouvèrnman franssé sé rokonstruir Mayotte é sirtou fèr an pé d’tan sak li la pa gingn fé an sinkantan konm instalassion piblik, konm dévlopman épi konm formassion, konm lantropriz épi ankor konm réspé la kiltir maorèz. Mi doute pa ké la Frans i gingn ar pa fér sa mé alor li doi rokonète son linkapassité. Rogarde in kou la vérité an fass siopuplé !

A bon antandèr, salu !

Justin