Mésyé Didier l’avé di konmsa pou lo zéléksyon la droit li va fé pou Mésyé Fillon. Sanm pou moin sé pars li la fé sign La Réjyon matignon2, in drol de kontra konm zot i koné, lé riskab anbaras nout bidzé pou inn-dé zénérasyon. Astér li di li fé pi pou Fillon pars, d’apré sak i di, lo ga n’oré déklar la kolonizasyon sé in partaz bann kiltir é sa i botré pa ditou lo prézidan. Konm mi konpran ali si sé lo vré rézon mé si sé pa lo vré rézon i pouré ète pars lo bato mésyé fillon l’apré pran lo fon.

Mé la pa tousa : so kou isi li roul pou Sarkozy. Solman Sarkozy lé pou l’asimilasyon é ki di l’asimilasyon sé mète toulmoun dann mèm moul donk inpoz toulmoun in sèl kiltir ki sré la kiltir fransèz. Alor kosa k’i fé avèk bann kiltir minoritèr ? Kosa k’i fé avèk lo métisaz bann kiltir ? Nou, isi La Rényon ni koné in réyon la-dsi é konm i di sé nout rishès. L’asimilasyon, an kontrèr, i pé pa ète in n’ot shoz ké nout l’abèsman kiltirèl. Ala sak mi pans touléka é la pa moin la invant in n’afèr konmsa é anplis, moin la touzour antann dir sa i fé pa d’tor nout l’antant rantre nou.

Solman oila, mésyé Didier, si mi tronp pa, li la di in zour li lé pou l’émansipasyon bann rényoné é l’émansipasyon kosa k’i lé, si la pa in libérasyon nout pèp dann tout domenn é anparmi la kiltir. Sé l’èr ké lé inposib konprann son postir. Soi li lé pou l’asimiasyon : kékshoz k’i doi z’ète kondané pars konm moin la di sé in abèsman pou bann pèp. Soi li lé pou son l’émansipasyon é dann in ka konmsa li la poin pou suiv Sarkozy. Mé si la asiz rant dé shèz ébin la, lé pa bon ditou.

Asiz rant dé shèz sé ète riskab bate out déyèr a tèr ! A moins ké log a sé in kontorsyonis !