So matin moin la bien antann aou parl dsi nout radyo proféré. Si mi tronp pa, so matin, ou té apré parl sèrvis militèr pars d’apré sak i di prézidan la Répiblik i vé rolans sèrvis militèr obligtoir pou bann fransé. Donk, ou té apré parl de sa é d’apré sak moin la konpri ou lé plito pour pou lo prinsip, plito pa pour pou la manyèr i doi fé sa, épi lo tan i doi fé sa.

Mésyé l’ékoutèr, mi an souvien ou lété apré di, in sèrvis militèr obligatoir, i doi pèrmète bann jenn jan-jenn fiy lèv bonèr bross z’ot dan, fé z’ot toilète konm k’i fo épi sirtou anpèsh azot an avoir lo tan pou fé tout kalité bétiz dann shomin ; a kroir aou, sèrvis militèr i pèrmète bann jenn grandi épi bien kon port azot dann la sosyété .

Mi èm bien antann bann zistoir konmsa, mé moin lé a d’mandé si sa lé vré, si lo rézilta atandi va réalizé pou vréman. Akoz pa fé in l’étid pou vérifyé lo konsékans sèrvis militèr kan li lété ankor oblifgatoir, é lo konsékans kan la siprime ali. Mé a bien oir sak mi di na poinn sans vréman pars ni koné bien la sosyété la fine shanjé é dann in ka kon sa lo mèm koz i produi pa touzour lo mèm l’éfé.

Donk dir sa sé dir n’inport kosa, é dir n’inport kosa, i vé pa dir di la vérité.

Ou sré plito kont lo tan in jenn i pass dsou lo drapo. Pou ou, troi moi lé tro kourt é i fo omoins dis mois. Antan amoin bien, mi vé pa dir in sèrvis obligatoir, na poin konsékans. A tou lé kou sa néna in konsékans

Lo promyé sé pou fé bèss lo nonm shomèr, pars in moun dsou lo drapo, sa i kont pa konm in shomèr. In dézyèm konsékans, sé in gro dépans é si i dépans pou la po patate, mi oi pa tro kosa i pé an sèrvir. An touléka, nou néna lo tan pou arkozé.

Alé, mésyé l’ékoutèr nout radyo proféré, skiz amoin si mi pran pa out kozman konm vérité d’lévanjil, mé konm va vote in sèrvis obligatoir, ni tard ar pa oir lo konsékans ?