Oté

Mésyé, Médam, La Sosyété koz èk moin sé koz èk in...

Témoignages.re / 20 zanvié 2020

JPEG - 43.6 ko

Mésyé, Médam, La Sosyété koz èk moin sé koz èk in kouyon-mé sé o pyé d’lo mir k’i oi lo mason. Mézami, zot i koné kosa i lé in pilon épi kosa k’i lé in kalou ? Biensir lo pilon sé lo mortyé konm demoun déor I di sa, é lo kalou sé lgalé la mèr sansa la rivyèr k’i sèrv pou kraz zépis é sa moin lé sir zot i koné. Astèr sans prop : in pilon néna son gabari dimansyon é shak kalou i sava avèk in pilon ; tout fason i fo absoiman in kalou adapté avèk out pilon, pars sansa ou i sava pa fé in bon travaye. Donk sa sé lo sans prop é si zot i rod lo sans figiré, sa I vé dir shak moun néna son koréspondan. Moin la mèm antann dir shak krapo néna son krapode. Mé antansyon ! Pou kosa antansyon ? Pars konm I di in bon zo i tonm zamé dann la gèl in bon shien. Alé ! Mi kite azot rofléshi la dsi é ni artrouv pli d’van. Sipétadyé !