Tyé sèt, blès katorz, sa in zistoir ni koné : zistoir in moun faye, lavé flank in koud’sèrvyèt épi la tyé sèt moush épi blès katorz. Solman li lété si tèlman fyèr an aoir fé sa, li la mark dsi in bando épi li la antour son tète avèk pou amontr demoun koman li lété for.

Zordi, mi pans Virapoullé : boug-la la fé kaziman in vi konm éli, mèr-li ; dépité-li, sénatèr-li. Li lavé san foi lokazion kozé, mèm fé propozission n’loi pou sèy fé sak li domann zordi : li vé bann amontrèr i travay La Rénion i konpran épi i koz kréol.

Ala riyink zordi li di sa ! Pou moin, li lavé lo tan épi san foi lokazion, sèy fé mète son zidé dann program tousa son bann gouvèrnman, la droite sansa la gosh. Li koup dé, défoi troi koté !
Li la pa fé !

Tan myé, si li rouv in pti pé son zié, mé li lé ankor kont lansègnman kréol dann lékol. Donk, i pé di li la pankor konprann granshoz. Alor, ala in pti konsèy pou li :
Mésyé Virapoullé, pardon-éskiz, bravo pou an aoir invante lo sho ! Mi bate la min pou ou ! Mé si ou vé alé pli loin, invante zèf bouyi : so kou issi, i fo mète lo zèf dann lo ! Ou konpran ?

Justin