Dimansh, moin la vi in bonpé z’élu apré rann vizit Samuel Mouen. Zot i koné, lo ga i fé la grèv la fain pou anpèsh siprime lo RSTA épi d’ot z’afèr ankor. An parmi bann z’élu, l’avé madam Dindar, prézidant Konsèy zénéral. Dann télé, moin la tandi aèl apré di, i fo dévlop La Rényon pou dévlop l’anploi, épi èl té apré di ankor, i fo èd bann l’antropriz pou an avoir l’anploi. Pétèt èl la di d’ot z’afèr, sa lé sir, mé konm moin lété pa la, mi koné pa tro bien ozis sak èl la rakonté.

I fo dévlop La Rényon ? Moin lé dakor avèk sa pars pou dévlop La Rényon, i fo dévlop bann z’antropriz, i fo dévlop la roshèrch, i fo fé l’ésplorasyon tout nout kapasité. La pa zordi Parti kominis i parl de sa, mé na in tan, té i sifi ké li di in n’afèr, é mèm si té vré, l’administrasyon épi bann z’élu la droit té i fé lo kontrèr. In l’égzanp ? Kan la fèrm lo trin, Paul Vergès la di, kas pa la voi, konm sa va ansèrv sa pli d’van. Kosa la fé ? La kas la voi. L’ané 2010, kosa té i sar fé ? Nout tout i koné é, malorozman, la droit épi bann sosyalis la arèt avèk sa, la fiziy nout dévlopman an plin vol, donk si i di zordi i fo dévlop La Rényon, forsé nou lé dakor, mé la pa avèk sak i fé nou va trap lo shomin.

In n’ot afèr, madam Dindar la di, i fo èd bann l’antropriz. Pou fèr kosa ? Pou pèy zot dèt, pou amélyor zot trézori ! Sa i amèn pa la gar é la pa arienk zordi i èd banna. La pa promyé foi i fé lo plan pou èd azot. Arienk dopi vint-an lé posib trouv plizyèr plan pou èd azot. Moin na ankor sa dan mon mémoir... Donk, pou moin, na in promyé z’afèr pou rodé. Kosa i lé ? Sé kèl dévlopman ni vé pou La Rényon ? Nana pou graté dan bann plan Parti kominis la fé, dan bann plan dévlopman réjyonal é dann z’éta zénéro l’ané 2009, san konté tout sak bann Rényoné la fine propozé.

Na pou graté, é si mèt nout tout ansanm… tout sak i vé vréman dévlop lo péi, mi pans ni pé an avoir konfyans.

NB : Mé si tout lé fé pou gonf lo pla bann profitèr, na poin arienn bon pou éspéré.

Justin