Oté dalon !* Akoz ou lé konmsa ? Diré toultan ou lé mavouz**, diré ou lé konm in kok la ginye la pépiy***, diré toultan out kèr lé gri, diré toutlan la vi lé mol pou ou. Akoz kan in moun i fé in bon n’afèr, i rosanm sa i intérès pa ou ; ou pans rienk tir défo, ou s’anfou, ou mazine sa ninport ki lé kapab fé, sansa i sèrv pa arien, sansa le moun i koné rienk fé lintérésan.Ou mazine solman demoun nana piston i pé an aoir kék-shoz.
Ou lé pa malad,ou lé pa mizèr-mizèr mem,ou nana out boushé manzé, out ti-loizir. Out famy lé solidèr avèk ou.Out kopin, sansa out kopine i em aou, nana in bone opinion sü ou. Out bann kamarad i em èt avèk ou. Mazine solman in pë tout kalité ou nana. Mazine bien ou tousèl nana in don, ou tousèl ! Don-la lé bien la, ptèt lé in pé kashièt, i domann rienk pou romont anlèr si ou vé bien. Si ou vé bien !
Ou lé jen. Out lavnir lé dovan ou. Bien sïr, nana La rénion ki ginye épi La rénion ki ginye pa ! Kisa la di aou, ou lé dan La rénion ki ginye pa ? Out kamarad, out famy,demoun ? Ou la pa blizé kroir azot. Si ou té kroi in pé dann out kapasité. Pétèt ou sort an-ba ou mont anlèr pli vit ou pans. Ou osi, ou ginye mèt aou anlèr. Ou osi, ou ginye mèt La rénion anlèr. Pran konfians !

Justin

*lettre à un jeune réunionnais.

***pépiy ou pépie : prostré.Poulet avec une corne sous la langue et qui l’empêche de manger.