Mem de loin, konm in bonpë dmoun La Rénion, mi suiv lékspérians kafé bourbon pointï. Moin lé préssé oir in bon rézïlta akoz pou moin dëpi la komanssé, mi pans i pë pa an oir in n’ot shoz k’in bon rézïlta. Moin lé anparmi sak i pans nout péi épï nout pèp nana son gou d’sèl.

Tazantan, moin té i gingn in pti nouvèl, moin té kontan : lë zafèr i avans. Ziskatan, moin la lir dann journal samdi, lë tan lékspérimantasion la fini, lë tan la prodïksion i komans.
Alor i arvien dann mon tèt lë tan la plant lë té : la foiré ! lë tan la sèy fé pyrètre : la foiré ! Lë tan tir d’lé dann papaye pou tandri la viann bann zamérikin : la foiré ankor ! Lë tan la fé vnï bann vash ostralyèn : i paré té plïto konm kabri. Etsétéra, étsétéra, la ké lë ra..

Donkalor mi di së foi issi, la fé in bon projé, épï bann moun la Rénion la rant dann ron, épï lë kafé sa lé anmaré avèk nou dëpï dann tan lontan. Konm in rèv k’i sort dann fon nout listoir.
Alor mi pans in vyé shanson karnaval téi di konm sa : « Mèt kafé dan mon moulin ; mon moulin, mon moulin va moulé ! »

Justin