Kan ni di désértin i mank a nou d’réspé pou vréman. Konmsik i prandré a nou in lidé alé ésplik bann moun déor, lo méyèr manièr fé kui zot manzé. Alé di in moun toulouz mèt pa zariko blan dann kasoulé, mèt plito zariko rouz, i konvyin mié ousinonsa ésplik in shèf norman, mèt pi la krinm frèsh dann son meni vik a nou kréol ni inm pa sa. Mwin pérsonèl mi ozré pa. Inn débarké l’ariv la Rényon pou fé in lémisyon d’si nout manzé.

Tousala o fré d’la prinsèss, d’si in shinn piblik, défréyé d’tout, lotèl a ou manzé a ou loto tousala. Pou désértin, i prétan dir sé in shèf rokoni konmtèl, pou désértinzot sé in “kokol gran shapo“ vik na pwin inn isi la antandi parlé d’li. Byinéz a li, nout manzé i konvyin pa li. Li na minm dégou nout manzé. Pou mwin li na lo drwa émé ousinonsa pa émé. Mé la ou li mank a nou d’réspé sé kan li ésplik a nou koman i fo fé pou amélior nout kuizinn.

Nout ti-boushon péi i ral pa li ditou, lé tro lian, lé tro lastik, i flèsh. Li la komanss gouté, la donn a li lanvi vomir. Konm tabitid li ésplik a nou koman i fo fé, pou li na pasé lon-yon, mèt in pé plis lon-yon, i mank la koryand, azout ot shoz… Pétèt mèt in pé safran ? Malorozman néna ankor tro d’ka ki fé gingn a nou la bil konm sa, ni siport arpa lontan i mèt kuyèr sal dan nout marmit pwa !