Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité

oin la bien lir sak ou la di dsi la koup d’érop é konm d’abitid mi antrovoi in drol pinn vizé dann in n’afèr konmsa : pou moin, mi ékout demoun isi La Rényon é mi antan z’ot kriyé par dizènn do milyé pou di konm de koi nou lé fransé é ni vé rès fransé. Donk i sèrv de rien signal in dopaz, inn-dé z’érèr désèr l’arbitraz, la kours pou ramas l’arzan plizanplis, é sirtou bann félisitasyo n pou désèrtin pti péi pou krétik an pasan foutbal La Frans épi d’ot gran péi. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Mi pé dir aou tout sak moin la ékri moin téi pans ali pou vréman. Mi pé mèm dira ou ké désèrtin gro poin nor konm lo l’akizasyon d’ashté lomatch, d’ashté in l’arbitnsa moin la pa ropran pou mon par pars zordi lé sirman tro bonèr pou bann lang komans bien baté, mé v’arivé sa, in zour, é pétète la pa arein k ‘La frans va fé figir d’akizé ;

Solman m’a dir aou in n’afèr zordi sé ké l’éspor i pé z’ète in bon romontan. In bon romontan pou ki ? Pou sak i konstat ké nana moiyin pou bann tikolon ansort azot in pé. Mi pé mèm alé pli loin. Ousa ? Ziska rapèl aou, konm rapèl lé z’ot, ké l’éspor la gingn l’okazyon pou akonpagn bann nasyon apré lévé é sa sé in n’afèr inportan pou moin.I pé di rosi sé lo moiyin, si ou nana in gran ésportif - konm in gran shantèr, sansa in gran pèrsonaz, in gran poèt dann out nasyon - armète dann bo-fiks lo moral demoun, édonn kouraj sak la fine pèrd kouraz dopi in koup de tan. Pou nout par ni apèl sa lo mète-an-l’èr in pèp, in nasyon, in klas sosyal pou èl vanjé.