Yèr nou la anparl in rényon avèk bann koléjien pou rogarde in fime épi koz-koz in pé dsi lo drame shagossien…Dann lo film néna in n’afèr la shoke bann jenn marmaye-la (toute l’avé douzan aproshan). Sak la shoke azot sé kan la momon Olivier Bancoult, dann in manifestassion i di sak mwin la marke an-o la : mète anou dann prizon, o moins nou va gingn manzé.

Sa lété kékshoz inkroiyab pou bann shagossien, abityé manz konm i fo dann zot paradi pèrdi. Zot téi gingn do ri dann magazin la konpagni, zot téi gingn galman lo grin, poisson téi gingn dan la mèr, krab ossi, léguime zot téi fé pouss dann zot zardin. Antanssion sa lété pa an kado mé in kontre-parti lo travaye zot téi fé téi apèl lo rassion é l’avé toute sak i fo pou viv ladan.

Zamé dann Shagoss maramye la parti dormi san manzé é sé sak i ariv azot kan zot i ariv dann péi déor, landroi bann zanglé l’avé dir azot zot noré toute sak i fo konm dann Shagoss, alé oir l’avé poin arien lété ptrévi pou zot.

Bann jenn kolékjien, kan i domann azot pou kossa té bann madam la pran la tète bann manifèstassion zot la réponn zot amontrèz sé pars bann madam i oi an promyé kan marmite lé vide é kan na poin manzé pou bann zanfan.

Ankor in n’afèr banna la romarké, sé kan dann film, momon Olivier-Rita Bancoult, èl téi apèl- i di el la vi in moune apré zète kékshoz dann poubèl. Alor èl la parti oir kossa i lé é èl la vi téi zète réstan d’pin l’avé pa vann, sansa l’avé pa manzé, alor èl la pran sa pou amenn son kaz-son mari té bien malade. In fonn shagrin li la trapé pars li téi pé pi rotourn Shagoss é èl mèm èl l’avé travaye ménaz mal péyé. Bann marmaye téi ariv pa konprann sa mèm si issi lontan lo manzé téi manke dann bonpé famiye.

In zour mwin la ékrir in pti tèks dsi lo troi fam la pran la tète bann manifèstassion é mi rapèl banna la fé la prizon mé la pa sédé. Zot la mèm fé manifèstassion, grèv la fain. Rita Bancoult, Charlésia Alexis, lisette Talate troi fam fyèr dan la lite bann shagossien é mi panss sa sé kékshoz la marke bann koléjien la Rényon.

A bon antandèr Salu !

Justin