Matante Zélida la ékrir Justin :
Mon shèr nové, mon spès salté,
Moin ossi moin lé vièy, moin ossi moin nana rimatis, sirtou lo mal — sak i done plis doulèr —, mé mi sava pa ésplinn dovan toulmoun, mèm pa dann in radio pèrkal. Mi kontante mon pti moiyin, mi fé avèk konm i di. Mi dépans pa plis sak moin néna, é pou insi dir, mi kontante èk sak mi gingn. I fo dir ossi, mi fé pa d’foli, mi aksèp pa toute la modèrnité initil. In kari, pa dé, pa d’téléfone portab, zétab, volab, pa d’voitir, mé lo kar jone. La télé, mi ansèrv sa aryink pou mon fèyton épi z’apré pou rogard mon pti prézidan Sarkozy é Didier, kan li pass ; La, la toush aou la ! Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Si mi konpran aou, ou sé lo modèl pou byin viv dann troizyèm laz. Toulmoun i doi fé konm ou, é lé shoz va marsh pli myé... Mi rapèl sak in vyé madam Sainte-Marie té i di na in bon koup de tan. Èl té i rakonte, Doktèr Raymond Vergès, dan son kanpagn, té i di toute vyé moun inkyète pi tro, byinto faktèr v’amène larzan salarié dovan zot porte. É larzan l’arivé, é bann vyé té kontan. Mé in pé la fé k’nou la mète a viv konm dan la Frans, suiv la mode, manz la vyann pli k’i n’anfo, pran labitide dépansé... L’èr-la, nou la pi gingn fèr fas. L’èr-la, nout ti moné té i pèrmète pi nou viv san traka. Byinsir, nou té i vé lo larzann salaryé, mé nou té i vé pa so mod konsomasyon. Mé té i falé suiv shomin bann méssyé l’avé tras pou nou. Pik par santyé ou l’avé pi lo droi. Noré pa di si té i sar mète anou dann in trin konmsa !

Justin