Mi randé amwin kont d’in n’afèr konmsa-sa i apèl linégalité sa — pars dann mon famiye, mon momon té instititriss é mon papa lété plantèr épi militan kominis é souvan défoi an ékoutan mon bann paran, sansa bann kamarad kozé mwin téi apèrssoi mwin téi viv dann in départman dézyèm katégori, antouléka mwin téi viv pa sou in rézime l’égalité.arzout èk sa dopi étan pti mwin la touzour lir témoignages é sa téi dézintokssik an pèrmananss mon tète an prézantan la réalité pou vréman, pa la réalité ofissyèl.

Astèr si téi ékout la radio é si téi rogard la télé kan la télé la sorti nou téi apèrssoi banna téi koz pa mèm langaj ké nout zouanal « défanss dé san défanss ». Mi rapèl mèm kan téi pass bann rézilta zélékssion bann zoinaliss téi ézite pa amontr anou bann rézilta frodé épi proklam élu sak lété pa an réalité… Donk nou téi apèrssoi l’avé in vérité nou téi lir dann zoinal témoignages épi sète nou téi antann dann rényon sansa kan in dirijan téi vien lakaz… Mi rapèl ossi bann kou d’kolèr nout papa kan téi mète ali déor bann biro é mi souvien apré zélékssion li téi boir bonpé zèrbaz pou romète ali daplon.

Astèr si mi parl lédikassion nassional épi la malonètté zélékssion sé pou dir azot koman mwin téi oi lo sistèm kolonyal dann tan-la. Mé si ni anparl lékonomi mi rann amin kont koman dann bann zané soissant nou téi viv dann in réjime l’inégalité. Sak i vé dir dopi la loi 1946 néna d’lo la fine koul dsou l’pon mé la réalité néokolonyal lé ankor la épi i pèz déssi nout pèp rényoné. Sé pou sa mi arète ar pa d’ kriye konm zordi : « mète in bon kou d’ frin dsi l’ord kolonyal siouplé.

A bon antandèr salu !

Justin