Médam, zé Méssyé, la Sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami lo inn pou la grèss, sa sé kétshoz mwin la antande étan marmaye é mi antan ankor zordi. Pou kossa ? Pars in bonpé d’moune i kontante pa avèk sak zot i gingn kan zot i ashté kissoi in pinte piman, kissoi zépi mayi, kissoi ankor in min pti banane, anfin toute sak i pèrmète gonf in pé lo pla é done aou l’inpréssyon ou la karote lo marchand.

Astèr ni pé domandé, pou kossa pou la grèss ? Mi doi dir mi oi pa oziss pou kossa. Pétète pars la grèss sé sak i arondi in pé, pou gingn in konte ron-A ! Si mwin l’avé in diksyonèr étimolozik, pétète li doneré amwin in bon réponss, amwins ké lo kréol la troke langaz pou dégiz kékshoze osinonsa pou koz mwin kri.

Alé ! Mi kite azot pou zot rofléshir la dsi é amenn galman zot kontribissyon. An atandan, ni artrouv pli d’van, sipétadyé.