Dann tan demoun téi bril la salté-pars i paré koméla na pi l’droi fé sa !- pou lo fé pran favèr, zot téi aroz in kou avèk pétrol sansa avèk l’alkol. Biensir, sa in n’afèr i fo pa fé. Lé vré dofé i pran myé, mé si flam do fé i vien arzoinn out figir, ou va donn amoin nouvèl. Na dé foi mèm dofé i pran dann linz demoun inpridan. I apèl sa « l’aksidan doméstik »… Mé na in n’afèr la pa in l’aksidan domèstik sé kan néna kékpar in wati-watia é olèrk kalmé désèrtin, par zot kozman, i agrav ankor lé shoz. Di pa moin zot i koné pa bann ka konmsa ! Pars néna sa toultan, tou lé zour, shak zour. La di - la fé, konm zot i koné i rann l’antant difisi. Sa nout tout i koné, mé sa i anpèsh pa nout lang bate initil. Alé ! Mi lèss azot rofléshi la dsi é ni artrouv pli d’van sipétadyé.