Matante Zélida la ékrir Justin :
Mon shèr nové, mon spès salté,
Vi pé mèm pa sipozé ziska kèl poin moin lé kontan dopi k’zot, bann rouj-de-fon, la pèrde zéléksyon. Dabor inn, moin lé kontan pars sé lo joli garsonn Tampon lé anlèr. Épi dé, pars konm mi konpran la, toute zot mové projé, la Droite l’apré kass par boute. Shak zour k’i pass i amène in bon nouvèl pou moin : la MCUR kassé, lo tram-train dérayé... Arzoute èk sa toute sak la Réjyon té i di té i rogard pa èl, bin la Droite i sava okipé. Fransh vérité, zot i doi zète dépité… donkalor, zot na ka prann in pé tizane matrékèr… sa lé bon kan ou lé in pé mavouz. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Mi doute pa ké vi doi z’ète kontan, mé sak i étone amoin sé k’demoun in pé plis intélizans ké ou i pé z’ète kontan zot ossi. Arète bann projé, san ranplas par d’ote, sé mète o shomaj in bon pé travayèr, sé mète zot famiy dan la déguène, sé kass zot projé d’vi. Vi pans pa ? Fé travay d’ote i doi fèr, sé gaspiy son prop larzan... An plis ké sa, sé pran lo risk gingn in boush ta guèl in zour, pars lé riskab in n’ot i di aou : okipe out afèr, sar déza assé ! Mète pa out kiyèr sal dann marmite i kui pa pou ou.

Justin