Médam zé méssyé la sossyété koz èk mwin sé koz èk in kouyon, mé sé o pyé d’lo mir k’i oi lo masson.

Mézami dé foi i di « Bour pa oute kuiyèr sal dann marmite i kui pa pou ou ». Mi poz amwin la késtyon : pou kossa i anparl lo kuiyèr sal ? Sinploman pars èl na poin arien pou fèr tèr-la vi ké ou lé pa konssèrné. Antouléka, sa i vé dir, mèl pa ou dann in n’afèr i konssèrn pa ou, pars ladan néna arienk l’inkonvényan pou atann aou.

Dabitide demoune lé for pou sa mèm san kalkil lo risk zot i kour dann in n’afèr konmsa. Astèr mèl pa dann sak i rogarde pa ou ! Oui mé lé pa touzour ké wi pé pa s’an mélé pars i di aou ossi si in moune lé dann danzé i fo porte sékour...

Final de konte mi panss sé l’intanssion k’i konte ladan : si l’intanssion lé bone i fo réspékt la déssizyon, si l’intanssion lé pa bone alor noute provèrb i aplik d’ofis.

Alé ! Mi invite azot pou rofléhi lka dsi é ni artrouv pli d’van, sipétadyé.