Tout demoun La Rényon i koné kossa k’i lé mové shomin. Parl bann plantèr z’ot shomin pou tir kane zot va antann. Kan la plui la fine byin doné, kan solèy la fine byin shofé, kan lo van la fine fé vol la tèr an pousyèr épi k’i dépoz patou déssi la rout... Mi di azot : sé aryink kaboss é ba-fon. Tansyon loto, tansyon traktèr, tansyon kamiyon, tansyon laksidan : ou lé kapab vèrsé si ou i fé pa antansyon.

Si i kroi bann politik nout lékonomi, nout sosyété, nout lanvironeman, nout kiltir lé konm sa ossi. Lé malizé amènn sa konm k’i fo, pars lanspèk nana pli k’i an fo. Mèm si demoun i kroi pa zot toultan, zot i kontinyé di nana tro d’lanspèk, na tro lo frin, na tro z’obstak pou avans konm k’i fo.

Byin sir, la, mi vé anparl bann politik, an parmi sak i oi in pé klèr, sak la fine byin réfléshi, sak la fine konpran lo tik-tak, lo maniman-la-manivèl. So bann-la i di nana dé shoz pou fé. Mé malérèzman, gouvèrnman i ékout pa zot, i kroi touzour zot l’apré invant problèm la poin, épi i sèy mèm pa konprann zot solisyon.

Toultan, mé pétète pa koméla, vik lo gouvèrnman la fine konprann li la poin bon solisyon, ké son loi pou l’outremèr lé pa valab, vik li di so loi-la la bézoin amélyoré. In pé i pans sé pou taz anou ankor in foi ! In pé i di k’i fo fé propozisyon, apré va oir si i tyinbo kont, sansa si i tyinbo pa...
Bon, la di nana Zéta-Zénéro. I prétan dir sé lokazyon pou mète tout "déssi la tab". Alon di nout solisyon, nou va oir kossa an o-lyé i fé avèk !

Justin