Médame, méssyé, la sosyété koze èk mwin sé koze èk in kouyon mé sé o pyé d’lo mir k’i oi lo masson. Mézami, pé s’fèr zot i koné pa kozman-la. Mwin pèrsonèl mwin la antann sa in zour d’zéléksyon kan in zéléktèr té apré di sa avèk lo prézidan dann biro. Lo prézidan la di non, mé lo soir té konmsa mèm la fé... Mé biensir la pa pou zéléksyon la invante sa, té égziss avansa é lé sinploman pou dir wi atann in rézilta ou lé sir pa gagné, pars li lé konte natire é wi fé kékshoz lo bon sanss i amontr aou i pé pa fère kissoi pars wi koné pa bien lé shoz, kissoi pars ou la tronpé kékpar dann sak ou la fé : mète do sèl dann gato é wi gingn ar pa in gato sikré... Mé antansyon, sak mi di, pétète zot i trouv lé fassil évite in pyèz konmsa mé la pa touzour : néna dé foi ou lé sir san pour san in n’afèr lé fo alé oir li lé fo pou vréman. In pé d’lojik siouplé ! Na dé foi sa i sifi. Alé ! mi kite azot rofléshi la dsi é ni artrouv pli d’ »van. Sipétadyé.