Matante Zélida la ékrir Justin :
Mon shèr nové, mon spès salté,
Si mi konpran byin la, zot la fine arkomans konploté ? Oui, mi di byin "zot", bann rouj-de-fon. Ala pa k’zot l’apré poz lanspèk pou fé kalbite ali avan l’ané 2012. Pars mi anparl pa Bogoss Promyé, lo roi la Réjyon, mi anparl lo pti bonom la-ba, roi d’la Frans, kaziman. Ala k’zot i mète rode pou-é-lante dann son shové. Ala pa k’i sava romonte ziska lané 1995 pou trouv in trikmardaz kont li, dann tan li té i fé la kanpagn pou Baladur. Mi anparl pa bann félon k’i manz dann son zasyète épi k’i krash anndan. Mi profèr di azot, pti bonom-la va kass azot an kat, konm i fé pète lo vant kankrola kapoté dsi ldo. Pèf ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Mi voi vou lé byin an kolèr. Mé kissa la kass vote mine kréyon ? Si vou la byin rogarde télé, la pa bann rouj ké l’apré konploté, mé sé bann blé, blé pal, sansa blé fonsé, blé vèr… zot i pans Sarko la afayi in pé, donk pou zot, zot tour l’arivé... pou pran son plas. L’èr-la, toute lé bon pou pous ali dann fon. Mé, matante, la pa li-mèm la nouri lo vèr pou pik son kèr ? La pa li-mèm la mal antour ali ? Alors, i fo pa li zoué l’étoné, i fo pa li fé konmsi li konpran pa sak i ariv ali. Konm di kréol : « Mètr an mètr, i trouv son mètr ! ».

Justin