Konbien foi moin la fine antann in kékshoz konmsa ! Mon vyé famiy plantèr té i koz pa otroman. Pou kosa ? Pars si ou i lès zèrb pousé, li pous plizanpli vite, plizanpli dir é boudikont ou i pé pi fèr fas. Sa, toulmoun i koné, mé konbien i aplik so bon prinsip-la ? in bonpé i profèr kan zot kou d’piosh i done in bon rézilta, i arash bonpé zèrb an mèm tan. Poitan, sa sé lo tan pèrdi é zot i koné dan la tèr la pa travaye k’i mank mé pou aplik lo prinsip i fo in sort révolisyon kiltirèl, in révolisyon la pa si fasil ké sa pou fé. Dann bann provèrb La Frans i di i vo myé prévnir ké guérir é sé sa mèm nou l’apré di dopi talèr-la. Alé ! Ni artrouv pli d’van sipétadyé !