Avan ni komanss avèk listoir Furcy i fo ni di dë mo dsi listoir son momon téi apèl Magdalena é banna la batiz aèl Madeleine. Donk kan ni anparl lésklavaz dann nout mazinassion épi nout kroiyans, dann nout tète ni oi in méssyé osinonsa in madam avèk lo tré afrikin. Dann ka Madeleine lété pa in moune téi sort l’afrik mé kélk’in i sorte laba dann l’Inn — i di sa in lindo-portiguèz. Donk dizon téi in zindyène ni pouré dir sé in malbarèz.

Madeleine té in moune i sorte dann in vil i apèl Chandernagor pa tro loinn in gran flèv i apèl lo ganj.donk Madeleine té éné l’ané 1759. Kan li l’avé a pène névan in rolizyèz téi apèl sèr Dispense l’avé ashté aèl avèk in portigué, Faustino de Santiago l’avé sède aèl lo pti fiye pou in pti pé larzan-55 roupi d’apré sak i rakonte dann liv Mohammed Aîssaoui la ékri avèk konm tite : « l’affaire de l’esclave Furcy ».

Pou komanssé sèr Dispense l’avé amenn aèl dan La franss dann la vil Lorient. Laba èl l’avé pèrde son zoli prénom Magdaléna pou pran lo nom Madeleine. Apré troizan dan La Franss èl l’ariv Bourbon dan son shominn rotour pou Chandernagor dann l’Inn. Sa té in promèss la sèr l’avé fé d’ramène aèl dann landroi èl lé né.

Mé wala la sèr Dispense kan l’ariv Bourbon la trouv èl lété tro fatigué pou rotourn dann l’Inn. El l’avé in konéssanss téi apèl madame Routier é èl l’avé romète Madeleine lo madam avèk konm promèss afranshi aèl épi ramenn aèl dann son péi d’néssans.

Mé wala ni koné bien souvan défoi in promèss i angaz arienk sak i kroi, pa sak i fé é madam Routier lété pa préssé pou réspèk son promèss. Nou va oir proshène foi kossa v’arivé pars sa i fé parti shominn kroi lo Madeleine, son fiye Constance, épi son garsson téi apèl Furcy.

A bon antandèr salu.

Justin