Mi sava pa toutsuit-la anparl azot la vi bononm-la pars pou rakonte son vi i fo prann lo tan. Dizon konm in zistoir i rakonte dsi galé dsi bordaz la rivyèr kissoi dé galé, kissoi d’la rivyèr dé plui, kissoi d’ote ankor, pars néna dé shoz pou dir épi pou rakonté é an plisské sa konm mi sorte di sa sé listoir la Rényon dann in pèryode bien kriyél k’i dovré d’ète bien konu par toute bann ti-kolon nout péi La Rényon pti konm gran, jenn konm azé.. Toute an az konprann la vérité mèm si la vérité souvan défoi sa i fé mal..

Dimansh passé mwin té anparmi bonpé pèrsone i apartien mon bann famiye é zistoman té apré anparl listoir Furcy, pars néna in sinéass i sorte fèr in fime la dsi : lo sinéass sé Abd Al Malik é lo tit sé « Furcy né libre »in film tourné l’ané 2025 é sa lé tiré d’in liv Mohammed AÏssaoui-in lékrivin zoinaliss la mète katran pou ékri a partir d’in paké dokiman dsi in prossé In zésklav la fé inn pèrsone l’avé priv ali son libèrté. Prossé-la la komanss l’ané 1817 pou fini l’ané 1843… Sa i fé 27 zané si mi tronp pa.

Donk dimansh plizyèr pèrssone té apré anparl lo film zot l’avé vi dann sinéma kéktan avan é ofiramézir zot téi komante mon koté mwin téi kaklkilla kaz mwin néna lo liv »l’affaire de l’esclave furcy » é dann mon télé fone néna plin vidéo la dsi épi bonpé komantèr… Mwin la juré mwin téi sava éssèye bien konprann listoir lo prossé dopi lo débi ziska la fin san obliye bann késtyon forséman mwin noré poz amwin la dsi.

Mi arète tèr-la pou l’instan mé mi panss promèss sé dète éinpromèss mi fé avèk mwin i fo toutfors mi sèye tenir.

A bon antandèr salu !

Justin