Sé Constance la pran lo pti koli é èl la komanss fouye dedan pou oir, kossa lété s o bann papyé son momon l’avé ramassé.L’avé in bann papyé ofisyèl épi konm mwin la di azot lo testaman Madam Routier avèk toute sak èl téi lèss pou son lérityé. Mé in l’obsèrvassion la pa mank étone Constance.

Inn modékri madam Routier-mor l’ané 1808- la lèss pou son lérityé é el téi domann ali d’libèr Madeleine pars èl l’avé afranshi sète-la dopi « bien lontan ». Lo bien lontan an késtyon lété l’ané 1789 é konm zot i koné libérassion-la lété pa suivi par in zèss — kékshoz konm koi èl téi propoz Madeleine son liberté. El i ékri Madeleine té résté fidèl ok mé sé in grav linzistiss pa libèr in zésklav afranshi é pa done ali lo moiyin pou gingn sa vi. Dann kode noir sa lété kant mèm bien marké sa.

Mwin la lir kékpar sak Madeleine téi vé lété la libèrté pou son gasson Furcy mé d’apré sak i di dann liv Mohammed Aissaoui épi sa lété dann mémoir in om de loi antiésklavaziss-mé nou va an roparl sa — toute bann diskission Madeleine l’avé avèk Madame Routier épi Joseph Lory la pa sèrv de rien pars téi fini touzour par in dispite é Madeleine téi vé pa so lanbordir-la tété riskab annuir Furcy é porte ali tor. Dann file mwin la anparl azot Furcy i di son momon téi vé paf é gingn ali zannuiman.

Mé wala, astèr Constance épi Furcy pars la sèr la inform lo frèr, dann papyé madam Routier l’avé do koi pou Furcy réklam son libèrté é sé sak v’arivé san tardé kan Constance épi Furcy va déside fé azir la loi mèm si sé la loi bann zésklavaziss é sa lé pa a fyé konm zot i koné.

A bon antandèr salu !

Justin