Astèr ni ariv bann zané 1815-1817 : 1815 Madeleine, la momon Furcy lé mor é èl la lèss troi paktaz pou son dë zanfan vivan — lo promyé Maurice lé fine mor-mé konm mwin la fine dir Lory, lo blan, la pran dé paktaz pou li é la lèss in paktaz papyé pou Clémence épi son frèr, madeleine l’avé prépar sa dopi l’ané 1808, lané la mortalité madam Routier.
Si lo mète lété in pé pli avizé, é in pé pli kiryé li nora pran prékossion pou rogarde in pé kossa l’avé dann lo pti paktaz. Dizon l’avé in bonb ladan : in bonb i ésplike oussa Madeleine lé né é koman èl l’ariv lorient épizapré lil bourbon, i ésplik galman l’ané 1789 Madam Routier l’avé afranshi Madeleine dovan notaire mèm san tir lo konsékans pou Madeleine épi pou son garson Furcy.
l’avé ankor in modékri madam Routier l’avé ékri pou domann son lérityé Lory pa obliye son promèss fète pou Madeleine : par rapor son lafranshisman téi falé libèr aèl épi ramenn aèl dann l’Inn landroi èl lé éné, la vil Chandernagor.
Biensir Madeleine té mor, mé son garson Furcy lété vivan é mète d’otèl shé Joseph Lory. Konm lo ga lé éné l’ané 1786 é son momon afranshi l’ané 1789, normalman Furcy té lib mé ziridikman li lété ankor lib pou d’ote rézon ké lo lafranshisman par madam Routier… Dabor èl lé né lib dann l’Inn é étan marmaye demoune l’avé mète ali dann lésklavaz. Konm bann zindien Chandernagor lété sizé lo Roi d’Franss téi pé pa mète ali an lésklavaz.
Arzout èk sa avèk in rolizyèz èl la parti lorient dann roiyom La franss é in kozman roiyal téi di : « Nul n’est ésclave an franss » é si ou lé, oute sézour dan La franss i fé d’ou in moune lib. Donk Furcy té lib pou in takon d’rézon zirid.

Ni arète la pou zordi mé la suite sar dann Témoignages.

Justin