Ni rapèl dann in promyé tan lo prokirèr l’avé done l’ord konsidèr Furcy konm lib par lo moiyin d’ in lésploi par luissier. L’afèr nora épi arète la pars inn foi lib pé sfèr La famiye Furcy nora arète la-mèm épi kontant aèl son bon droi té rokoni. Mi di noré pu, pars dann in n’afèr konmsa avèk bann parti konmsa i koné pa vréman si l’afèr nora arète la.

Mwin la fine dir azot Constance l’avé fine konsilt bann zom de loi é banna l’avé di ali konmsa lété possib gingn in bon some an zistiss pars Madeleine-lo momon — afranshi dopi l’ané 1789 noré du d’ète lib dopi date-la, mé ni madam Routier, ni Joseph Lory l’avé réspèk lo droi Madeleine mé galman lo droi furcy si ni mète anou dann lidé Furcy lé né lib.

Mé téi falé kont dsi bann kolon blan pou trik la loi épi pou torde la zistiss sé konmsa ké dann promyé prossé téi éspass l’ané 1817 dan la kour la jole bann gro blan ésklavaziss la pa vréman débate dsi lo droi mé la désside in majorité d’nèf kont onze plizyèr linzistiss : inn la di Desbassyns l’avé rézon fé arète Furcy épi mète ali la jol konm lory téi domann, dé Furcy té zésklav vi ké li téi rèss shé madam Routier épi méssyé Lory konm zésklav, troi la désside lo sibstiti lo prokirèr Sully brunet lété kassé d’son post é ranvoyé dan lo légzagone.

Biensir lo prokirèr Boucher l’avé rolèv l’apèl mé Desbassyns l’avé monte in bob kont li si tèlman té li k’té aparète konm lo montèr d’lafèr Furcy é lo boug la pran bato pou rante La franss épi li la pi rovni dann péi bourbon é wala pou kossa lo prossé an apèl la tèrmine an siniss komédi konm lo prossé an promyé instanss. Pou ashové Desbassyns la konvink Lory pou éspèdyé Furcy dann lil Maurice pou alé laba dann in propriyété li l’avé pou travaye laba konm zésklav dann kann… Mé listoir i arète pa la.

A bon antandèr salu !

Justin