Gilbert Boucher l’avoka la dévlop plizyèr moiyin d’zistiss pou done rézon son kliyan : Biensir Madeleine té afranshi par madamre Routier l’ané 1789 é Furcy lé né l’ané 1786 donk li noré di d’ète afranshi kan son momon té afranshi mé finalman lé pa sak Furcy téi ve. Li téi vé k’i déklar ali lib an néssan.

Biensir la rolizyèz l’amenn aèl Lorient an franss pou son lédikassion katolik donk èl lévni an franss. L’èr-la Konm pèrsone lé ésklav an franss Madeleine té pou pèrde sotit zésklav lo zour èl l’ariv an franss. Donk lib èl l’akoush d’in zanfan lib pars la sityassion d’in zanfan Furcy i suiv sète son momon d’apré la loi lo kode noir.

Donk furcy lé né lib.

Madeleine té an ésklavaz shé madam Routier épi shé lory donk sé in violassion d’la loi é sa téi mérite in bon dédomajman. Furcy ossi té i doi toush dédoma jman-la.

La Cour roiyal la désside Furcy lé né lib. La désside galman lory téi doi Furcy la som Dis mil fran é sa té inn bone som dann lo tan.. Mé i paré Lory lé mor in pé d’tan apré é Furcy noré pa toush tout lo moné i doi ali.

Aprésa Furcy la rotourn Maurice é li la kontinyé son bann zafèr dann la konfizri ziskatan li lé mor l’ané 1856. Li téi lèss déyèr li in madam inn-dé zanfan épi in lantropriz bien prospèr d’apré sak i paré.

Wala in konba égzanplèr mé pa in konba pou labolission lésklavaz, in konba pou pèrmète furcy fé rokonète par la zistiss li lé éné lib é so kalité d’om lib la fini par éte rokoni par la zistiss franssèz. Dizon lo zistoir lé fini in pé an labrézé pars mwin la shoizi rézime ali konmsa.

A bon antandèr salu !

Justin