Mé nou la di ossi lo kan-la téi koné pa la fors lo kan énmi dann in tan la sossyété ésklavaziss lété for pou vréman… A komanssé par Joseph Lory li-mèm. Li lété pa in pti zésklavaziss lo ta mé kélk’in l’avé moiyin an pagaye. Dann liv Mohammed Aîssaoui mwin la anparl azot i di Lory l’avé troi gran propriyété dann troi vil Péi Bourbon. Li l’avé mèm inn dann lil de franss (Moris si zot i vé) é son famiye téi okip fé prospèr bann bien-la.

Arzout avèk sa li l’avé protékssion dann klan madame Desbassyns in propriyétèr l’avé par-la kat san zésklav épi an prime bann zom de pouvoir dann Bourbon. Sé konmsa in gran blan Desbassyns Richmond in gran résponsab la sékirité dann bourbon té in protéktèr Joseph Lory. An plisské sa la sossyété zésklavaziss la pran lo parti zésklavaziss.

Fèr in prossé lé possib mé gagn lo prossé lété pa prouvé d’avanss é kèl réakssion lo parti ésklavaziss téi sava avoir kan furcy téi sabva déklansh lo zostilité é sa l’ariv par in komandman lo sibstiti lo Prokirèr la anvoye l’huissier porte sa pou Joseph Noury… Dann komandman-la lété ékri téi falé lo blan téi rann son libèrté Furcy dann lo méyèr délé.

Si tèlman kan l’huissier l’arivé avèk lo papyé in pé pliss Lory téi éklate avèk la kolèr mé li té blijé lèss Furcy alé. É li téi kriyye « sa sé mon léritaz, mon léritaz !" ; Toutsuite apré li la parti oir Desbassyns Joachim épi li la domann k’i mète Furcy dan la geole é sé sak té fé apré mèm pa in zourné d’libèrté. Lo gran konba l’avé komanssé ?

A bon antandèr salu !

Justin